- સોમવારે સવાર સુધીમાં 157 દેશોમાં કોરોના વાઈરસના કુલ 1,69,515 કેસ સામે આવ્યા, કુલ 6,515ના મોત
- અમેરિકન સરકારે કહ્યું- સોમવારથી દેશમાં 2 હજાર હાઈસ્પીડ લેબ શરૂ થશે, મેડિકલ સ્ટાફ રજા પર
- સ્પેન, ઈઝરાયલ અને ઈટાલી પછી લેબનાનમાં પણ લોકડાઉન, અમેરિકન નેવીમાં એક સૈનિક કોરોના પોઝિટિવ
વોશિંગ્ટન: કોરોના વાઈરસનો પ્રકોપ હવે 157 દેશો સુધી ફેલાઈ ગયો છે. સોમવારે સવાર સુધીમાં કુલ 1,69,515 કેસ સામે આવ્યા છે. મૃત્યુઆંક 6,515 સુધી પહોંચી ગયો છે. સારી વાત એ છે કે, 77,753 લોકો ઈન્ફેક્શનમાંથી સારા પણ થયા છે. અમેરિકાએ 29 રાજ્યોની સ્કૂલોમાં આગામી આદેશ ન મળે ત્યાં સુધી સ્કૂલો બંધ કરવાનો આદેશ આપ્યો છે. ડોનાલ્ડ ટ્રમ્પ સરકારના જણાવ્યા પ્રમાણે બે હજાર હાઈસ્પીડ લેબ સોમવારથી શરૂ થશે. પોપ ફ્રાન્સિસ પણ વેટિકનથી નીકળીના રોમની ખાલી રસ્તાઓ પર નીકળ્યા હતા. તેમણે મહામારી ઝડપથી ખતમ થાય તે માટે પ્રાર્થના કરી હતી.
અમેરિકામાં 68ના મોત
અમેરિકામાં કોરોના વાઈરસને ટક્કર આપવા માટે શક્ય તેટલા પ્રયત્નો કરવામાં આવી રહ્યા છે. સોમવાર સવાર સુધીમાં અહીં કુલ 3,737 કેસ સામે આવ્યા હતા. અહીં 68 લોકોના મોત થયા છે. ન્યૂયોર્ક સહિત 29 રાજ્યોમાં પણ સ્કૂલ આગામી આદેશ સુધી બંધ કરી દેવામાં આવી છે. અમુક રાજ્યોમાં કોલેજો પણ બંધ કરી દેવામાં આવી છે. નેવી શિપ યુએસએસ બોક્સર પર એક સૈનિકને કોરોના પોઝિટિવ જોવા મળ્યો છે. ઉપરાષ્ટ્રપતિ માઈક પેન્સના જણાવ્યા પ્રમાણે, સોમવારથી બે હજાર હાઈસ્પીડ લેબનું કામ શરૂ કરવામાં આવશે. તેનાથી ઈન્ફેક્ટેડ લોકોની ઓળખ અને સારવાર વધારે સરળ થઈ જશે. અહીં હેલ્થ ઈમરજન્સી પહેલાં જ જાહેર કરી દેવામાં આવી છે.
લેબનાનમાં લોકડાઉન
લેબનાને તેમના દરેક એરપોર્ટ બંધ કરી દીધા છે. સીમાઓ અને પોર્ટ પર બે સપ્તાહ સુધી કોઈ આવાગમન નહીં થાય. સૂચના મંત્રી મન્નાન અબ્દુલ સમદના જણાવ્યા પ્રમાણે, બહુ જરૂરી ન હોય ત્યાં સુધી લોકો ઘરમાંથી બહાર નીકળવાનું ટાળે. અમુક અન્ય દિશા-નિર્દેશ પણ ટાળવામાં આવ્યા છે. લોકોને કહેવામાં આવ્યું છે કે, લોકડાઉનના નિયમોનું કડક રીતે પાલન કરવું. અહીં સોમવાર સુધી 100 લોકો ઈન્ફેક્ટેડ નોંધાયા છે. કુલ 3 લોકોના મોત થયા છે.
પોપ ફ્રાન્સિસ પણ સક્રિય
કોરોના મહામારીએ સર્વોચ્ચ ઈસાઈ ધર્મગુરુ પોપ ફ્રાન્સિસને પણ ચિંતિત કરી દીધા છે. પોપ રવિવારે બપોરે વેટિકનથી નીકળીને રોમના ખાલી રસ્તાઓ પર જોવા મળ્યા હતા. વેટિકનના એક નિવેદનમાં કહેવામાં આવ્યું હતું કે, પોપ રોમના રસ્તાઓ પર નીકળ્યા હતા. તેઓ બે એવી જગ્યાઓ પર ગયા હતા જ્યાં શ્રદ્ધાળુઓ જાય છે. રવિવારે વેટિકનમાં આવેલું સેન્ટ પીટર્સ સ્ક્વેર ચર્ચ પણ ખાલી જોવા મળ્યું હતું.
